SEA Walerwiss zu Éilereng
Den 3. Mäerz 2025 gouf déi nei SEA Walerwiss offiziell an a Presenz vun alle Bedeelegten, dorënner de Gemengerot an déi zoustänneg Gemengeservicer. Invitéiert waren och d‘Martine Molitor, Première Conseillère de Gouvernment aus dem Educatiounsministère, déi fir de Minister Claude Meisch un der Aweiung deelgeholl huet, an de René Greisch vu GR Immotrust, dee fir de gesamte Projet zoustänneg war.
Zënter dem 16. September 2024 ass d’SEA op der 5, Place des Acacias zu Éilereng bei der Kierch a Betrib, an huet Plaz fir 60 scolariséiert Kanner tëscht 3 an 12 Joer, dorënner 3 bis 4 Kanner mat enger Behënnerung, wéi d’Chiara Theis, Responsabel vum Moies- a Mëttes-Accueil, bei der Aweiung preziséiert huet.
„Hei op dëser Plaz, wou an der Zäit – an déi Éilerenger wëssen dat – nach de Kaufmanns Jemp seng Terrainen hat an och mol eng Wiertschaft war, ass lo eng flott Plaz entstane mat Epicerie, Coiffeur, Tätowéierer an eben eng Maison Relais“, sou d’Buergermeeschtesch Simone Asselborn-Bintz.
Éischt Skizze fir d‘Betreiungsstruktur louche schonn 2015 um Dësch. Duerch d’Corona-Pandemie an aner Ëmstänn huet sech de Projet méi laang gezunn, sou dass den eigentleche Chantier réischt no 4 Joer konnt ofgeschloss ginn.
D’Struktur besteet aus verschiddene Funktiounsraim, déi speziell op déi pädagogesch Handlungsfelder ausgeriicht sinn. Fir komplett inklusiv ze sinn, gouf alles op engem Stack an um Parterre installéiert, besonnesch fir Kanner mat enger Behënnerung.
De selwechten Dag war och d’Aweiung vum neie Fussballsterrain zu Éilereng.
Fotoen: Steve Ginepri / Gemeng Suessem
