Startschoss fir de Sportzenter um Belval

E ganze Koup Bäll goufen dëse Freiden, 21. Mäerz 2025 zesummen op de Gol geschoss, fir den Optakt vun den Aarbechte ronderëm den neie Sportzenter um Belval ze feieren.
 
A Präsenz vun de Ministere Yuriko Backes, Claude Meisch, Georges Mischo a Stéphanie Obertin, souwéi der Directrice vum Fonds Belval Daniela Di Santo, Deputéierten a Membere vum Suessemer Schäffen- a Gemengerot, huet d’Buergermeeschtesch Simone Asselborn-Bintz an hirer Ried ënnerstrach, dass dëse Centre sportif dofir suerge wäert, dass d’Liewensqualitéit um Belval an och iwwer d’Grenze vun der Gemeng eraus héich gehale gëtt. Besonnesch jonk Leit bräichte Plazen, wou een sech begéint, sech beweegt, a wou een säi Sport ausübe kann. De Nelson Mandela hätt scho gesot: “Sport huet de Pouvoir, fir d’Welt ze veränneren. En inspiréiert a vereent Mënschen op eng eenzegaarteg Manéier.”
 
Dëse Sportzenter ass ënner anerem fir d’Schoule geduecht, dorënner d’Lycéeën aus dem Süden an natierlech d’Universitéit. Donieft kréien d’Kanner aus dem Fondamental aus der Suessemer Gemeng, sou wéi et am Gesetz virgesinn ass, Unitéiten an der Schwämm. Och d’Veräiner an d’Sportfederatiounen, souwéi déi zukünfteg Trainerinnen an Trainere sollen hei hir Plaz kréien, an do wou et méiglech ass och de Grand Public. Coursen an Aktivitéite sollen ënner beschtméigleche Bedingunge stattfannen, an de Virwëtz an d’Ausprobéiere solle gefërdert ginn.
 
Direkt nieft dem Lycée Bel-Val an dem Park um Belval wäert den Zenter ënner anerem aus enger grousser Multisporthal, 3 Basengen, enger Klotermauer an elauter Baussenterraine bestoen. Och en Jogging- a Fitnessparcours gehéiert dozou. Déi geplangte Bauzäit ass 36 Méint.